WATCH DOCS – гэта Міжнародны фестываль дакументальнага кіно аб правах чалавека, першыя паказы якога адбыліся ў 2001 годзе ў Варшаве. Штогод фестываль збірае на сваіх пляцоўках гледачоў і гасцей з усяго свету, каб прыцягнуць увагу да актуальных падзей у свеце і стварыць прастору для абмеркавання.
Большасць фільмаў-гэта працы сусветна вядомых рэжысёраў, адзначаныя ўзнагародамі прэстыжных фестываляў, уваход на паказы-прынцыпова свабодны для гледачоў.
WATCH DOCS Belarus з’явіўся ў Мінску ў 2015 годзе намаганнямі аднадумцаў-арганізатараў і дзясяткаў валанцёраў. Наш унутраны лозунг “Правы чалавека праз эстэтыку кіно”.
Менчукі ўжо двойчы мелі магчымасць убачыць унікальную сусветную дакументалістыку, пагаварыць з героямі фільмаў і рэжысёрамі, паўдзельнічаць у дыскусіі з экспертамі ў такіх актуальных пытаннях, як іслам у сучасным свеце, лічбавая бяспека, залежнасць падлеткаў, карупцыя і Панамскі архіў, праца праваабаронцаў у Беларусі, падзеі ва Украіне і інш.
Акрамя асноўных паказаў у Мінску фестываль наведае і рэгіёны. Дакументальныя кінастужкі пакажуць у Мазыры, Гродна, Стоўбцах і Віцебску.
Дарэчы, другі год запар фестываль будзе праходзіць у Стоўбцах пры падтрымцы Стаўбцоўскай раённай арганізацыі “Таварыства беларускай мовы імя Францішка Скарыны”.
Фестываль складаецца цалкам з валанцёраў, якія пераводзяць фільмы і вырабляюць субцітры, займаюцца падрыхтоўкай і мадэрацыяй сустрэч з рэжысёрамі і экспертамі, арганізоўваюць вольны час гасцей, займаюцца прасоўваннем фестывалю ў сацсетках, рыхтуюць рэцэнзіі і артыкулы ў прэсе, вырабляюць ролікі і іншую рэкламу фестывалю і іншае.
Арганізатарам фестывалю з’яўляецца грамадскае аб’яднанне “Звяно“.
Крыніца: Фэйсбук