Жыхарка в. Бердаўка Лідскага раёна заваявала сімпатыю чальцоў журы яшчэ падчас тэлекастынгу, а ў паўфінале даказала, што годная выходзіць на вялікую сцэну, за што і атрымала шмат кампліментаў ад чальцоў журы. А ад спевака Аляксандра Саладухі – дзесяць балаў.
Разынкай выступу было і тое, што спадарыня Інэса з Бердаўкі выканала песню на бездакорнай французскай мове, а Саладуха пачуў у голасе спявачкі нават ноткі, характэрныя для Мірэй Мацье.
Інэса Парфенчык – адзін з кіраўнікоў і салістаў народнага сямейнага ансамбля Парфенчыкоў “Мы з вёскі-калыскі”, які прапагандуе беларускую песню. Летась яна стала пераможцай фестывалю песеннага фальклору памяці Земавіта Фядэцкага “Цёплыя вечары, ды халодныя ранкі…”. Цяпер праект “Фактар.ВУ 60+ ” раскрыў у ёй і эстрадную спявачку.
Адзначым: з 12 паўфіналістаў у фінал “Фактар.ВУ 60+” прайшлі восем артыстаў. Іх выступ гледачы ўбачылі на тэлеканале “Беларусь 1” у пятніцу, 15 сакавіка, у 20:45. У фінале былі вызначаны імёны чатырох суперфіналістаў. І Інэса Парфенчык прайшла ў суперфінал. Аляксандр Саладуха зноў паставіў ёй дзесяць балаў.
Наш кар.
