Дзень роднай мовы 21 лютага ў Лідзе пачаўся напісаннем 16-й Агульнанацыянальнай дыктоўкі ў Лідскай раённай бібліятэцы імя Янкі Купалы. Ахвотныя напісаць дыктоўку не змясціліся ў чытальнай зале і зянялі дадаткова частку камп’ютарнага пакоя.
Пярэдняя частка залы была аздоблена выставай твораў класікаў беларускай літаратуры.
Дыктоўка была прысвечана 700-годдзю горада Ліды. Пісалі тэкст “Вялікі князь Гедымін”. Чытала дыктоўку намеснік дырэктара бібліятэкі Алена Адамаўна Быстрыцкая.
Прысутнічалі журналісты Лідскага тэлебачання, “Лідскай газеты”, электроннай газеты “Наша слова.pdf”.
Лідзяне шануюць імя Вялікага князя Гедыміна. У супольнасці з уладамі быў створаны бульвар Гедыміна, адрэстаўравана і адкрыта вежа Гедыміна ў Лідскім замку, пабудаваны рэстаран “Гедымін”, усталяваны помнік Гедыміну, правялі хакейны турнір памяці Гедыміна.
Падчас дыктоўкі яе ўдзельнікі змаглі не толькі праверыць уласныя навыкі ў беларускім пісьменстве, але і папоўніць веды па біяграфіі заснавальніка горада.
У сценах Лідскай раённай бібліятэкі Агульнанацыянальная дыктоўка пісалася ў 15-ты раз. Тут не змаглі напісаць 1-ю (тады дыктоўку неабачліва прызначылі на каталіцкі Вялікдзень), а ўсе наступныя без збояў ішлі адна за адной. І калі 700 гадоў Ліды – значны кавалак гісторыі, то 15 гадоў дыктовак у лідскай бібліятэцы – таксама ўжо кавалачак гісторыі, сведчанне таго, што народ не адвярнуўся і не збіраецца адварочвацца ад роднай мовы. Наадварот людзі заўважна ахвотна яднаюцца вакол нацыянальных каштоўнасцяў асабліва на фоне сённяшняй няпростай рэчаіснасці.
Яраслаў Грынкевіч.
