Шаноўны Леў Мікалаевіч!
Напоўніцу ўсведамляючы Ваш каштоўны ўнёсак у беларускую культуру, шчыра і сардэчна віншуем Вас з юбілеем.
Зычым здароўя, душэўнай моцы, а таксама творчай нязгаснасці, якая крэпіць-мацуе руку і зрок, квеціць душу, лагодзіць настрой.
Мы, жыхары Нясвіжчыны, глыбока ўдзячныя Вам за творчае шанаванне вялікіх людзей нашага нясвіжскага краю. Па-за ўсякімі пратаколамі і рашэннямі лічым Вас ГАНАРОВЫМ ЖЫХАРОМ Нясвіжа.
Асаблівая ўдзячнасць за высакародны чын у гонар і памяць маякоў нашай нацыі – Кірылы Тураўскага, Вінцэнта Дуніна-Марцінкевіча, Францішка Багушэвіча, Кастуся Каліноўскага, Янкі Купалы, Максіма Багдановіча.
Вы з годнасцю пранеслі праз жыццё культурны ген Вашага нясвіжскага настаўніка Міхала Сеўрука, высокія якасці сапраўднага беларускага інтэлігента і творцы, перадалі іх праз сына і вучняў у нашу нацыянальную будучыню.
Святкуем разам з Вамі !
Сябры Нясвіжскай раённай арганізацыі ГА “Таварыства беларускай мовы імя Францішка Скарыны”.
Кастрычнік 2020 г.
