З 28 лютага да 15 сакавіка навучальны працэс у БНТУ пераводзіцца на навучанне паводле індывідуальнага плану для кожнага студэнта. Цягам бліжэйшых двух тыдняў заняткаў у аўдыторыях не будзе, паведамляе прэсавая служба ВНУ.
Рэктарат Беларускага нацыянальнага тэхнічнага ўніверсітэту паведамляе, што надзвычайнай сітуацыі няма. Пакуль інфекцыйнае захворванне з’яўляецца адзінкавым выпадкам. Тым не менш з 28 лютага ва ўніверсітэце ствараецца штодзённы кантроль за станам здароўя студэнтаў і выкладчыкаў.
Рэктарат прыняў рашэнне пра абмежаванне наведвання не толькі інтэрнатаў, але і наагул будынкаў ВНУ. Да 15 сакавіка БНТУ пераводзіцца на індывідуальнае навучанне. Заняткаў у аўдыторыі да гэтага часу не будзе.
Адмяняюцца таксама і масавыя мерапрыемствы.
27 лютага ў студэнта з Ірану, які навучаецца ў БНТУ, афіцыйна пацвердзілі наяўнасць каронавірусу. Грамадзяніна Ірану і асобаў, з якімі ён кантактаваў, змясцілі ў Менскі інфекцыйны шпіталь. Медыкі паведамляюць, што інфікаваны пачувае сябе здавальняюча.
