37-гадовы Аляксандр Кадлубай стаў намеснікам міністра адукацыі.
Згоду на яго прызначэнне 29 ліпеня даў Аляксандр Лукашэнка. Што пра яго вядома?
Даволі нечаканае кадравае рашэнне, пры тым што Аляксандр Кадлубай займаў да гэтага сціплую пасаду начальніка аддзела адукацыі Лідскага райвыканкама.
Родам ён з Карэліцкага раёна Гродзенскай вобласці. Хадзіў у школу ў вёсцы Варонча. Месцы вядомыя па краявідаў Напалеона Орды, тут бывалі Адам Міцкевіч і Ян Чачот.
Бацька будучага намесьніка міністра Уладзімір Кадлубай быў дырэктарам прафесійна-тэхнічнага вучылішча ў Міры Карэліцкага раёна.
Аляксандр вучыўся ў БДУ на гістарычным факультэце, тут жа сустрэў будучую жонку Алену.
Яна цяпер працуе настаўнікам гісторыі ў СШ №8 у Лідзе. Дзве іх дачкі–блізняткі Вера і Люба перайшлі ў дзевяты клас.
Аднакурснікі Аляксандра ўспамінаюць, што ён адрозніваўся высокай культурай, паважлівым стаўленнем да ўсяго беларускага, але пры гэтым, па іх словах, быў кан’юнктуршчыкам.
На гістфаку вучылася і сястра Аляксандра Аксана. Цяпер яна жыве ў Маскве, выйшла замуж за расейца.
