14 красавіка ў беларускім цэнтры пры Саборы св. Кірылы Тураўскага ў Нью Ёрку адбылася прэзэнтацыя першага нумара першага ў гісторыі Беларускай фатаграфіі пэрыядычнага выданьня па фатаграфіі — “БЕЛАРУСКА-АМЭРЫКАНСКАЯ ФАТАГРАФІЯ” Зянона Пазьняка.
Першы нумар пэрыядычнага выданьня быў складзены з 2 частак. Першая частка – гэта падборка фотаздымкаў спадара Зянона “Тыпажы Нью-Ёрка”. Аўтар падзяліўся тым, што фатаграфія заўсёды была адным з накірункаў яго творчай дзейнасці. Падчас быцця ў Амэрыцы ў спадара Зянона назбіралася шмат фотаздымкаў, якія можна падзяліць недзе на дзевяноста тэмаў.
Другая палова выдання – гэта падборка фотаздымкаў спадара Джона Кунстадтэра, у прошлым – амэрыканскага дыплямата, сёння – прафэсыйнага фатографа, які падчас дыпляматычнай працы ў Беларусі палюбіў беларускую вёску, простых людзей, якія там жывуць, і штогод прыязджае ў Беларусь здымаць простых беларусаў, іх культуру і побыт.
Фактычна, першы нумар “БЕЛАРУСКА-АМЭРЫКАНСКАЙ ФАТАГРАФІІ” складаецца з дзьвух частак, якія можна назваць наступным чынам: “Амэрыканцы вачыма беларуса” і “Беларусы вачыма амэрыканца”.
Апрыканцы прэзэнтацыі аўтар падзяліўся, што ў бліжэйшых нумарах альманаху з’явяцца фатаграфіі Уладзімера Кармілкіна, Яўгена Шатохіна, Алеся Крыштаповіча і іншых.
Фота: Віктар Дудараў
Крыніца: Фэйсбук
