Экспэрты Свабоды назвалі найлепшыя кнігі, выдадзеныя ў 2018 годзе. Галасаваньне праводзілася ў трох намінацыях: проза, паэзія, нон-фікшн.
Найлепшай празаічнай кнігай прызналі «На ўсякім сьвеце» Ўладзімера Някляева (57 балаў). За ёй ідуць «Мае дзевяностыя» Альгерда Бахарэвіча (55) і «Сузіральнік» (53) Андрэя Федарэнкі.
У паэзіі найбольшую колькасьць балаў (67) атрымаў зборнік балядаў Уладзімера Арлова «Паручнік Пятровіч і прапаршчык Здань». На другой пазыцыі — зборнік Алеся Разанава «Такая і гэтакі: талакуе з маланкай дождж» (63), на трэцяй — зборнік Алега Мінкіна «Мяне тут не было…» (54).
У намінацыі непрыдуманай літаратуры першы радок заняла кніга Зьмітра Бартосіка «Клініка кітайскага дантыста» (73), якая выйшла ў бібліятэчнай сэрыі Радыё Свабода. «Бульба ў райскім садзе» Паўла Касьцюкевіча на другім месцы (37), «Прыпадобніўшыся да насарога» Алеся Анціпенкі — на трэцім (32).
Мы прасілі нашых экспэртаў назваць у кожнай з трох намінацыяў па пяць найлепшых, на іх думку, кніг году. Падлік праводзіўся сумаваньнем балаў за кожную пазыцыю сьпісаў: за першую 10, другую 9, трэцюю 8, чацьвёртую 7, пятую 6 балаў.
