Першы адкрыты міжнародны фальклорны фестываль-конкурс „Прамень” пройдзе 17-18 лістапада ў Гомелі ў Гарадскім цэнтры культуры. На сцэне цэнтра аматарскія і прафесійныя калектывы, індывідуальныя выканаўцы з усіх рэгіёнаў Беларусі прадставяць кампазіцыі традыцыйнага фальклору, а таксама аўтарскія творы ў фальклорнай стылістыцы. Па словах арганізатараў, фэст аб’яднае каля 120 чалавек. Лепшых трэба будзе вызначыць у намінацыях „Вакал”, „Інструментальнае выканальніцтва”, „Харэаграфія”. Журы, у склад якога ўвойдуць вядомыя артысты, педагогі творчых дысцыплін, рэжысёры, кіраўнікі калектываў, дзеячы культуры і мастацтваў, назаве таксама ўладальнікаў Гран-пры і спецыяльных узнагарод. Акрамя конкурснай праграмы для ўдзельнікаў і гасцей фэсту запланаваны розныя майстар-класы. Лепшыя нумары прагучаць на гала-канцэрце, дзе таксама выступяць лідfр этна-трыа „Троіца” Іван Кірчук, фолк-праект „Ягорава гара”. Па выніках конкурсу будзе створаны каталог выканаўцаў і калектываў, якім прапануюць удзел у новых творчых праектах.
Чытай больш на: https://www.racyja.com/kultura/mizhnarodny-falklorny-festyval-kon/
