Лідскія пісьменнікі – частыя госці ў вучняў 11 школы г. Ліды. Прадметныя тыдні, юбілеі, урачыстыя падзеі…
Нагодай для чарговай сустрэчы на гэты раз стаў Дзень роднай мовы. А хто як не сапраўдны пісьменнік данясе да падлеткаў прыгажосць роднага слова? І назва літаратурнай гасцёўні “Таткава мова, матулін напеў…” сапраўды адпавядала нагодзе сустрэчы.
Словы выбраны не выпадкова, гэта радкі з верша лідскай паэтэсы Ганны Рэлікоўскай, якая і завітала ў госці да вучняў. Юныя аматары паэзіі пачулі неверагодна прыгожыя вершы на роднай мове ў выкананні аўтара і змаглі ацаніць шматграннасць творчасці Ганны Леанардаўны. З заміраннем сэрца, здавалася, некаторыя падлеткі слухалі паэтычныя шэдэўры, якія былі прысвечаныя роднай мове, малой радзіме, любай матулі, роднай дачцэ, кахан-ню. Прыйшліся да спадобы юнакам ды дзяўчатам і жартоўныя вершы, амаль гумарэскі, на сучасныя сюжэты, якія непасрэдна маюць адносіны да моладзі.
Цікавымі для ўдзельнікаў гасцёўні стала і біягра-фічная даведка пра паэтэсу. Ганна Леанардаўна цяпер знаходзіцца на заслужанным адпачынку, але ў мінулым яна працавала настаўніцай гісторыі ў СШ № 8, 17, і амаль адзінаццаць гадоў яе працоўны шлях быў звязаны з 11-й лідскай школай, дзе яна з 2006 па 2017 год выконвала абавязкі намесніка дырэктара па вучэбнай рабоце. Родам яна з вёскі Кянці Лідскага раёна, якую вучні наведалі віртуальна падчас прагляду паэтычнай відэазамалёўкі. Шмат друкуецца ў перыядычных выданнях, часопісах “Западная Двина”, “Метаморфозы”, яе вершы размешчаны ў паэтычных зборніках “Ад лідскіх муроў”, “Дарослыя – дзецям”, “Мая маленькая радзіма”, “Шануйце роднае слова”, “Поэзия – души движение” і інш. Тэмы вершаў яна не выбірае, не прыдумвае, яны, як заўважыла паэтэса, складаюцца самі. Друкуе свае вершы з часу, калі была навучэнкай Ваўкавыскага педагагічнага вучылішча. А паэтычны дэбют на старонках лідскага раённага выдання “Уперад”, цяпер “Лідская газета”, адбыўся ў 1983 годзе. Да сёняшняга дня Ганна Леанардаўна захоўвае нумары газет, дзе былі надрукаваны яе вершы яшчэ пад дзявочым прозвішчам Стэфановіч. Сёння паэтэса з’яўляецца ўдзельніцай некалькі літаратурных аб’яднанняў: “Чертог поэта”, “Суквецце” пры рэдакцыі “Лідскай газеты”, рэспубліканскага грамадскага аб’яднання беларускага літаратурнага саюза “Полоцкая ветвь”.
Мілагучная паэтычная мова, цікавасць да творчасці таленавітай паэтэсы і прыемнай суразмоўцы, удумлівыя погляды вучняў, усмешкі на жартоўныя вершы – усё гэта стварыла цёплую атмасфера сустрэчы літаратурнай гасцёўні “Таткава мова, матулін напеў…”, якая прайшла ў школьнай бібліятэцы і, я ўпэўнена, надоўга застанецца ў памяці вучняў.
Наталля Мікалаеўна АНАШКЕВІЧ,
класны кіраўнік 11 класа
г. Ліда, школа № 11.
