Набліжаецца апошні месяц 2023 года, а за ім і сам Новы 2024 год. Па добрай беларускай традыцыі надышла пара выхаду з друку самых розных календароў.
Мы знайшлі інфармацыю пра чатырнаццаць выданняў, але, магчыма, не ўсе заўважылі. Вялізны выбар календароў на наступны год, да якога застаецца нейкі там месяц з хвосцікам. І календары працягваюць выходзіць.
Пра адрыўны каляндар “Родны край” мы ўжо пісалі. Пісалі пра каляндар “Знакамітыя людзі Шчучыншчыны”. Сёння паведамляем яшчэ пра два.
Краязнаўчым выдавецтва “Рыфтур” падрыхтаваны адразу два насценныя кален-дары ў серыі “Планета Беларусь” – па гістарычных і прыродных мясцінах, як напісана на вокладках, для вашых падарожжаў.
На старонках першага календара прадстаўлены галоўныя архітэктурныя цікавосткі краіны – гарадзішчы, замкі, цэрквы і касцёлы, паказаныя з вышыні птушынага палёту. Другі каляндар паказвае найбольш дзікія куткі Беларусі, прыроду нацыянальных паркаў, заказнікаў і запаведнікаў з выявамі характэрных для гэтых тэрыторый птушак ці звяроў. Усе здымкі выкананы прафесійным фотамастаком Сяргеем Плыткевічам, які кіруе выдавецтвам.
Набыць календары за 22,41 руб. можна ў каталогу “Планета Беларусь”.
Краязнаўцы Дзятлаўшчыны падрыхтавалі і выпусцілі прыгожы насценны каляндар на 2024 год “Знакамітыя людзі Дзятлаўшчыны” Сваімі землякамі дзятлаўчане могуць ганарыцца. Іх даволі шмат. На календары “Знакамітыя людзі Дзятлаўшчыны” адлюстраваны 22 знакамітыя асобы Дзятлаўшчыны XV-XXI стагоддзяў. Сярод якіх – Канстанцін Астрожскі, Казімір Леў Сапега, Альбрыхт Радзівіл, Ігнат Дамейка, Лукаш Дзекуць-Малей, Ігнат Дварчанін, Міхась Петрыкевіч і іншыя. Каляндар “Знакамітыя людзі Дзятлаўшчыны” адрасаваны перш за ўсё тым, хто цікавіцца гісторыяй сваёй маленькай радзімы, а таксама нашай агульнай гісторыяй і яе знакамітымі асобамі.
Добра было б, каб падобныя календары пад-рыхтавалі і выпусцілі краязнаўцы з іншых рэгіёнаў.
Паводле СМІ.