Македонія афіцыйна памяняла назву і цяпер называецца Паўночная Македонія. Пра гэта 12 лютага ў сваім Twitter напісаў міністр замежных спраў краіны Нікола Дзімітраў. „Мы толькі што абмяняліся вярбальнай нотай: Прэспанскае пагадненне ўваходзіць у сілу. Няхай сённяшні дзень стане пачаткам доўгага сяброўства паміж Грэцыяй і Паўночнай Македоніяй. Мы не можам змяніць наша мінулае, але можам і будзем фармаваць нашу будучыню, заснаваную на сяброўстве, партнёрстве і супрацы”, – падкрэсліў Дзімітраў. Спрэчка датычна назвы Македонія доўжылася каля 30 гадоў. Грэцыя блакавала еўраінтэграцыйныя памкненні Македоніі, выступаючы супраць назвы гэтай дзяржавы, назву Афіны лічаць грэцкім этнонімам. 2 чэрвеня 2018 года прэм’ер-міністры Македоніі і Грэцыі абвесцілі, што новай канстытуцыйнай назвай Рэспублікі Македонія стане „Паўночная Македонія”. 19 кастрычніка 2018 года парламент Македоніі бальшынёй галасоў падтрымаў змены ў канстытуцыю. якія патрэбныя для перанаймення краіны. 11 студзеня 2019 года парламент зацвердзіў новы тэкст канстытуцыі з папраўкамі. 25 студзеня парламент Грэцыі ўхваліў пагадненне аб перайменаванне Былой Югаслаўскай Рэспублікі Македонія ў Рэспубліку Паўночная Македонія. 6 лютага 29 амбасадараў краін – сябраў НАТО паставілі подпісы пад пратаколам аб далучэнні Македоніі да гэтага альянсу. Беларускае Радыё Рацыя
Чытай больш на: https://www.racyja.com/palityka/makedoniya-afitsyjna-stala-paunochnaj-m/
