На краўд-фандынгавым сайце “Талака” ідзе збор сродкаў на выданне кнігі “Пра паганства і балтаў”. За ініцыятывай стаяць аўтары парталу “Свайкста”.
У кнігу ўкладзены шэраг тэкстаў, вялікіх і малых, што ўзятыя са згаданага сайту. Але многа і іншых тэматычных тэкстаў, што на “Свайксце” не публікаваліся.
Апроч таго, у кнігу змешчанае даследаванне пра паганскія рухі ў краінах па суседстве з Беларуссю – па-беларуску такога дагэтуль не было.
Кніга ўкладзеная, змакетаваная. Прафесійны дызайнер зрабіў прыгожую вокладку з выявай святога Сцёб-каменя, што пад Бягомлем. З друкам дамоўлена. Кніга выходзіць не падпольна, але з усімі патрэбнымі афіцыйнымі звесткамі. Выйдзе ўжо ў верасні.
Гэтая кніга – першая з запланаванай серыі “Бібліятэка “Свайксты”. Ад таго, якой будзе падтрымка грамады, залежыць і працяг гэтай серыі. Спадзяемся радаваць чытачоў штогод увосень.
Фандрэйзінгавая кампанія даступная па гэтай спасылцы. Аўтары абяцаюць, што папярэдні кошт кнігі – істотна ніжэйшы, чым будзе ў продажы. Сродкі ідуць на аплату друку, транспартавання ад друкарні, рэгістрацыйных выдаткаў, прамоцыю, правядзенне прэзентацый.
