Юр’е для Беліцы – храмавае свята. Менавіта тут знаходзіцца касцёл Святога Юр’я. 3 траўня ў мястэчку ладзілася фальклорнае свята “Юр’еўскі карагод”.
Свята атрымалася такое, што і сонца, здаецца, спецыяльна выглянула паглядзець! Было ўсё, як мае быць: і юр’еўскія песні – душа аж разварочваецца, і карагоды – ногі самі ў скокі ідуць, і нават пастухоў ушанавалі, каб год быў багаты ды ўдалы.
А яечня! Ох, тая самая, рытуальная – не проста страва, а сапраўдны смак дзяцінства і традыцый. Хто паспрабаваў – той ведае.
І, канешне, канцэрт – нашы фальклорныя калектывы далі такую энергетыку, што самыя сур’ёзныя пачалі ўсміхацца і падпяваць.
Калі шчыра, такія святы – гэта не толькі пра традыцыі. Гэта пра нас з вамі: пра сустрэчы, жарты, цеплыню і тое самае адчуванне, калі “свае людзі” побач.
Дзякуй усім, хто быў разам – вы стварылі гэты настрой!
ТК “Культура Лідчыны”.
