Не спудзілі тры залпы птушак,
Жалобна не гулі званы –
Сыходам цішу не парушыў
Жаўнер прайгранае вайны.
Як сымбаль у труну паклалі
Няздзейснай славы медалі,
Бо маршалаў перамагалі –
Яму ж даць рады не змаглі.
Ні зброяю, ні залатоўкай
Узяць не здолелі ў палон,
Праз гвалт паўсталага натоўпу
Змяняўся свет, але не ён.
Не верачы ідэям цмяным,
Нязломным сэрцам адзінца
Свайму штандару быў адданы
Да надмагільнага капца.
Імшу па ім адправіць вецер,
Праз год дзяцей не прывядуць,
Не ўрадавы вянок – букецік
Ля крыжа хтось пакінуў тут.
Снег занач кветкі запарушыць
Азнакай доўгае зімы,
Спакой ваш смерцю не парушыў
Жаўнер забытае вайны.
Прысягу й смерцю не парушыў
Жаўнер бясконцае вайны.
Зміцер Захарэвіч.
